سید محمد جعفری فطری طور پر ایک مزاحیہ شاعر تھے مزاح نگاری میں طنز ان کا خاصا تھا ویسے بھی طنزومزاح کو منظوم کرنا بہت مشکل کام ہےان کی شاعری کے پیش نظر مریض نہیں بلکہ مرض ہوتا ہے شاعر اپنے ذاتی تجربے کی بنیاد پر یہ پیغام دیتا ہے کہ کسی چیز کی خوبیوں اور خامیوں کو جانچے بغیر تعریف نہیں کرنی چاہیے۔ایبسٹریکٹ آرٹ اٹھائیس اشعار پر مشتمل نظم ہے جو ان کی مشہور کتاب “شوخئ تحریر سے لی گئی ہے۔
نظم کا نام : ایبسٹریکٹ آرٹ
شاعر: سید محمد جعفری
تشریح : سید محمد جعفری فطری طور پر ایک مزاحیہ شاعر تھے مزاح نگاری میں طنز ان کا خاصا تھا ویسے بھی طنزومزاح کو منظوم کرنا بہت مشکل کام ہےان کی شاعری کے پیش نظر مریض نہیں بلکہ مرض ہوتا ہے شاعر اپنے ذاتی تجربے کی بنیاد پر یہ پیغام دیتا ہے کہ کسی چیز کی خوبیوں اور خامیوں کو جانچے بغیر تعریف نہیں کرنی چاہیے۔ایبسٹریکٹ آرٹ اٹھائیس اشعار پر مشتمل نظم ہے جو ان کی مشہور کتاب “شوخئ تحریر سے لی گئی ہے۔
پکاسو دور جدید کا سب سے بڑا تجریدی آرٹ کا مصور اور موجد تھا جو سپین میں پیدا ہوا۔ پکاسو کے باپ اکیڈیمی آف آرٹس میں پروفیسر تھا۔ تجریدی آرٹ کی بات کی جائے تو اس میں مصور اپنے جذبات و احساسات کا اظہار اکثر آڑھی ترشی لکیروں اور رنگوں کے ذریعے کرتا ہے لیکن ایک عام ناظر کے لیے یہ فن ایک ڈراؤنے خواب سے کم نہیں ہوتا۔
شاعر موصوف کو ایک نمائش پر جانے کا اتفاق ہوا ، رسم دنیا نبھاتے ہوئے انھوں نے وہاں فن پاروں کی تعریف بھی کر ڈالی ان دونوں غلطیوں کی سزا اس طرح ملتی ہے کہ اب انہیں ڈراونے خواب آنے لگتے ہیں جن میں انہیں وہی تصویریں خوف زدہ کرتی رہتی ہیں جو انہوں نے نمائش میں دیکھی تھیں. اس طرح ان کی نیند اور سکھ چین برباد ہو جاتا ہے۔
کہیں پہ ٹانگ ٹیڑھی ہے’ کہیں پہ آنکھ ٹیرھی ہے
یہ تجریدی نہیں ہے اس کو تخریبی کہا جائے
کیونکہ جب کوئی اس نمائش کے بارے میں سوال کرتا ہے تو شاعر کچھ بھی بتانے سے قاصر ہیں ، وہاں کمالِ فن کا نمونہ وہ تصویر تھی جس میں شاید بھینس کے جسم پر اونٹ کی سی گردن لگائی گئی تھی اس کی ٹانگیں مسواک سی پتلی اور ناک کی طرح خطرناک تھیں۔ایک اور شہ پارہ محض رنگوں کا ایک بے ہنگم مجموعہ تھی جس پر موجود آڑی ترچھی لکیریں کسی شکستہ آئینے سے منعکس ہونے والی کرنیں معلوم ہوتی تھیں ۔فنِ تجرید کے ایسے عجیب الخلقت نطارے دیکھ کر وہاں آئے بچے اپنی ماؤں سے لپٹے جاتے تھے انصاف کا تقاضا یہی تھا اپنی اس تقصیر کو معاف نہ کیا جائے یہ نمائش حقیقت میں کسی دیوانے کا خواب تھی۔
کیسی تصویر بنائی مرے بہلانے کو
اب تو دیوانے بھی آنے لگے سمجھانے کو
ایبسٹریکٹ آرٹ
ایبسٹریکٹ آرٹ کی دیکھی تھی نمائش میں نے
کی تھی ازراہِ مروّت بھی ستائش میں نے
آج تک دونوں گناہوں کی سزا پاتا ہوں
لوگ کہتے ہیں کہ کیا دیکھا تو شرماتا ہوں
صرف کہہ سکتا ہوں اِتنا ہی وہ تصویریں تھیں
یار کی زلف کو سلجھانے کی تدبیریں تھیں
ایک تصویر کو دیکھا جو کمالِ فن تھی
بھینس کے جسم پر اک اونٹ کی سی گردن تھی
ٹانگ کھینچی تھی کہ مسواک جسے کہتے ہیں
ناک وہ ناک خطرناک جسے کہتے ہیں
نقشِ محبوب مصوّر نے سجا رکھا تھا
مجھ سے پوچھو تو تپائی پہ گھڑا رکھا تھا
یہ سمجھنے کو کہ یہ آرٹ کی کیا منزل ہے
ایک نقّاد سے پوچھا جو بڑا قابل ہے
سبزہء خط میں وہ کہنے لگا رعنائی ہے
میں یہی سمجھا کہ ناقص مری بینائی ہے
بولی تصویر جو میں نے اُسے الٹا پلٹا
میں وہ جامہ ہوں کہ جس کا نہیں سیدھا الٹا
اُس کو نقاد تو اِک چشمہء حیواں سمجھا
میں اسے حضرتِ مجنوں کا گریباں سمجھا
ایک تصویر کو دیکھا کہ یہ کیا رکھا ہے
ورقِ صاف پہ رنگوں کو گرا رکھا ہے
آڑی ترچھی سی لکیریں تھیں وہاں جلوہ فگن
جیسے ٹوٹے ہوئے آئینے پہ سورج کی کرن
بولا نقاد جو یہ آرٹ ہے تجریدی ہے
آرٹ کا آرٹ ہے تنقیدی کی تنقیدی ہے
تھا کیوب ازم میں کاغذ پہ جو اک رشکِ قمر
مجھ کو اینٹیں نظر آتی تھیں اُسے حسنِ بشر
بولا نقّاد نظر آتے یہی کچھ ہم تم!
خُلد میں حضرتِ آدم جو نہ کھاتے گندم
ابسٹریکٹ آرٹ بہر طور نمایاں نکلا
“قیس تصویر کے پردے میں بھی عریاں نکلا“
وہ خدوخال کہ ثانی نہیں جن کا کوئی آج
بات یہ بھی ہے کہ ملتا نہیں رنگوں کا مزاج
دیر تک بحث رہی مجھ میں اور اس میں جاری
تب یہ ثابت ہوا ہوتی ہے یہ اِک بیماری
اس کو کیوب ازم کا آزار کہا کرتے ہیں
اس کے خالق جو ہیں بیمار رہا کرتے ہیں
ایبسٹریکٹ آرٹ کے ملبے سے یہ دولت نکلی
جس کو سمجھا تھا انناس وہ عورت نکلی
ایبسٹریکٹ آرٹ کی اس چیز پہ دیکھی ہے اساس
“تن کی عریانی سے بہتر نہیں دنیا میں لباس“
اس نمائش میں جو اطفال چلے آتے تھے
ڈر کے ماؤں کے کلیجوں سے لپٹ جاتے تھے
ایبسٹریکٹ آرٹ کا اِک یہ بھی نمونہ دیکھا
فریم کاغذ پہ تھا کاغذ جو تھا سُونا دیکھا
وہ ہمیں کیسے نظر آئے جو مقسوم نہیں
“لوگ کہتے ہیں کہ ہے پر ہمیں معلوم نہیں“
ڈر سے نقادوں کے اِس آرٹ کو یوں سمجھے تھے ہم
“شاہدِ ہستئ مطلق کی کمر ہے عالم“
الغرض جائزہ لے کر یہ کیا ہے انصاف
آج تک کر نہ سکا اپنی خطا خود میں معاف
میں نے یہ کام کیا سخت سزا پانے کا
یہ نمائش نہ تھی اِک خواب تھا دیوانے کا
کیسی تصویر بنائی مرے بہلانے کو
اب تو دیوانے بھی آنے لگے سمجھانے کو
( شاعر: سید محمد جعفری )